Қарағанды Қазтұтынуодағы университетіндегі «ғылым апталығы – 2026» іс-шаралар шежіресі 2026 жылғы 6–10 сәуір аралығында Қарағанды Қазтұтынуодағы университетінде «Ғылым апталығы – 2026» өткізілді.
«ҒЫЛЫМ АПТАЛЫҒЫ– 2026»-НЫҢ БІРІНШІ КҮНІ: 6 сәуір 2026 жыл.
«ҒЫЛЫМ АПТАЛЫҒЫ–2026»-ның ашылу рәсімінде құттықтау сөзбен сөз сөйлегендер: ғылыми жұмыс және инновациялар жөніндегі проректорСихимбаев М.Р., Ресей Федерациясы жоғары мектебінің еңбек сіңірген қызметкері, И. Кант атындағы Балтық федералдық университетінің (Калининград қ., Ресей) Ситуалогия және экономикалық-құқықтық өңіртану ғылыми-білім беру орталығының директоры, з.ғ.д., профессор Волчецкая Т.С., «Тұран» университеті (Алматы қ.) Құқық ғылыми-зерттеу институтының директоры, з.ғ.д., профессор Акимжанов Т.К., сондай-ақ факультеттердің декандары және университеттің құрметті өкілдері. Ғылыми әлеуетті дамытудың, жастардың зерттеу белсенділігін ынталандырудың және академиялық әрі қолданбалы салаға инновацияларды енгізудің маңыздылығы атап өтілді. Апталықтың ашылуы ғылымды насихаттауға және жас ғалымдарды қолдауға бағытталған іс-шаралар сериясының (ғылыми семинарлар, мастер-класстар, дөңгелек үстел, консультациялық семинарлар және т.б.) басталуын білдірді.
2026 жылғы 10 сәуірде Қазтұтынуодағы Қарағанды университетінің базасында «Дүниежүзілік экономика» білім беру бағдарламасы бойынша XVIII Республикалық студенттік олимпиада және World Talent стартап-жобалар байқауы өтті.
Іс-шара Қазақстанның жетекші жоғары оқу орындарының студенттерін біріктіріп, дүниежүзілік экономика саласындағы теориялық білімдерін, аналитикалық дағдыларын және практикалық құзыреттерін көрсетуге арналған маңызды академиялық алаңға айналды. Қатысушылар жоғары дайындық деңгейін, сыни ойлау қабілетін және өз білімдерін өзекті экономикалық міндеттерді шешуде қолдана білуін көрсетті.
Олимпиада бағдарламасына дүниежүзілік экономика саласындағы кәсіби білімді бағалауға бағытталған жеке тестілеу, сондай-ақ студенттердің инновациялық идеялары мен кәсіпкерлік әлеуетін анықтауға арналған стартап-жобалар байқауы кірді.
Жеке тестілеу нәтижелері бойынша бірінші орынды әл-Фараби атындағы Қазақ ұлттық университеті иеленді. Қалыптасқан дәстүрге сәйкес, жеңімпаз университет келесі жылы олимпиаданы өткізу эстафетасын қабылдайды.
World Talent стартап-жобалар байқауы аясында бірінші орынды Есіл университетінің командасы иеленіп, тәжірибелік маңыздылығы мен іске асыру әлеуеті жоғары, жан-жақты әзірленген инновациялық жобаны ұсынды.
Олимпиада мен байқаудың өткізілуі академиялық ұтқырлықты дамытуға, жоғары оқу орындары арасындағы ынтымақтастықты нығайтуға, сондай-ақ ғылыми қызметке бағытталған дарынды жастарды қолдауға ықпал етті.
XVIII Республикалық олимпиада мен «World Talent» стартап-жобалар байқауының жеңімпаздарын құттықтаймыз:
Асылхан Динара Бейбітқызы (әл-Фараби атындағы ҚазҰУ) — жекелей тестілеуде 1-орын.
Кущенко Анастасия, Митай Анель және Байгутдинов Руслан (Есіл Университеті) — стартап-жобалар байқауында 1-орын.
Оқуда сәттілік, барлық идеяларыңыздың іске асуын және жаңа кәсіби жетістіктер тілейміз!
Қазтұтынуодағы Қарағанды университетінің өкілдері жетекші жоғары оқу орындарының мансап орталықтарының қатысуымен Еңбек мобильділігі орталығы базасында өткен жұмыс кездесуіне қатысты.
Іс-шара түлектерді жұмысқа орналастыру саласындағы өзекті мәселелерді талқылауға, сондай-ақ білім беру ұйымдары мен еңбек нарығы арасындағы өзара іс-қимылды жетілдірудің тиімді тетіктерін әзірлеуге бағытталды.
Кездесу барысында қатысушылар тәжірибе алмасып, жас мамандарды жұмысқа орналастырудағы кедергілерді, мамандықтарға деген сұраныс деңгейін және алынған біліктілік бойынша жұмысқа орналасу мәселелерін талқылады. Мемлекеттік білім беру тапсырысы бойынша түлектердің міндетті жұмыспен өтеу мәселелеріне ерекше назар аударылды.
Еңбек мобильділігі орталығының директоры Сыздықов Н.Х. құттықтау сөз сөйлеп, жастарды жұмыспен қамту мәселелерін шешуде жүйелі тәсілдің маңыздылығын және түлектер арасындағы жұмыссыздық деңгейін төмендетуге бағытталған бірлескен бастамаларды іске асыру қажеттігін атап өтті.
Кездесу қорытындысы бойынша тараптар ынтымақтастықты жалғастыруға, ақпараттық өзара іс-қимылды күшейтуге және өңір жоғары оқу орындары түлектерін табысты жұмысқа орналастыруға ықпал ететін нақты шараларды әзірлеуге уағдаласты.
Қазтұтынуодағы Қарағанды университетінде университет базасында өткен география пәні бойынша облыстық олимпиаданың қорытындылары шығарылды. Интеллектуалдық сайысқа Қарағанды қаласы мен Қарағанды облысындағы жалпы білім беретін мектептердің, гимназиялар мен лицейлердің 10-11 сыныптарынан 50-ден астам оқушы қатысты.
Жыл сайын өткізілетін олимпиаданың мақсаты – география ғылымын дәріптеу, сондай-ақ оқушыларға кәсіби бағдар беріп, болашақ мамандықты таңдауға ықпал ету.
Іс-шараның әдістемелік, ұйымдастырушылық және ақпараттық қамтамасыз етілуін «Туризм және мейрамхана ісі» кафедрасы жүзеге асырды.
Қазылар алқасының құрамына Қазтұтынуодағы Қарағанды университетінің оқытушылары кіріп, қатысушылардың дайындық деңгейі мен географиялық зерттеулерге деген қызығушылығын жоғары бағалады.
2026 жылғы 18 наурызда университетіміздің қабырғасында «Ақпараттық қоғам жағдайындағы социомәдени динамика» тақырыбында, оқу ордамыздың 60 жылдық мерейтойына орай халықаралық ғылыми-практикалық конференция өтті.
Конференцияға Қазақстан, Ресей, Болгария және басқа да елдерден жетекші ғалымдар мен қоғам қайраткерлері қатысты. Конференция қатысушылары ақпараттық қоғам жағдайындағы социомәдени динамиканы дамытуға, цифрландыру үдерістерін белсенді енгізуге және қоғамдық институттарды жаңғыртуға бағытталған бірқатар ұсынымдар әзірледі. Цифрлық дәуірде ұлттық бірлікті нығайтуға, этносаралық қатынастарды үйлестіруге және әлеуметтік әділеттілік тетіктерін жетілдіруге ерекше назар аударылды. Баршаға білімге, технологияларға және өзін-өзі жүзеге асыру мүмкіндіктеріне тең қолжетімділікті қамтамасыз ететін инклюзивті цифрлық ортаны қалыптастырудың маңыздылығы атап өтілді. Аталған ұсынымдарды іске асыру жаһандық өзгерістер жағдайында қазіргі қоғамның тұрақты дамуы мен бәсекеге қабілеттілігінің негізгі факторы ретінде қарастырылады.
Барлық қатысушыларға белсенді қатысқандары, нәтижелі жұмыстары және ғылыми әрі қоғамдық диалогты дамытуға қосқан құнды үлестері үшін алғысымызды білдіреміз.
2026 жылғы 18 наурызда Қазтұтынуодағы Қарағанды университеті Қарағанды облысы бойынша «Даму» кәсіпкерлікті дамыту қоры» АҚ өңірлік филиалымен ынтымақтастық туралы меморандумға қол қойды.
Меморандумға қол қоюдың негізгі мақсаты – білім беру, ғылым және инновациялар саласындағы өзара іс-қимылды кеңейтуге бағытталған ұзақ мерзімді серіктестік қатынастарды дамыту. Тараптар кадрларды даярлау және қайта даярлау сапасын арттыруға, ғылыми-зерттеу қызметін дамытуға, сондай-ақ университет түлектерін жұмысқа орналастыруға жәрдемдесуге бағытталған бірлескен бастамаларды іске асыру үшін күш біріктіруге ниетті.
Меморандумға қол қою университет үшін стратегиялық маңызға ие және өңірдің кәсіпкерлік секторымен байланыстарды нығайтуға бағытталған. Ынтымақтастық білім беру үдерісіне заманауи бизнес-практикаларды енгізуге, оқытудың тәжірибеге бағдарлануын арттыруға және студенттердің сұранысқа ие кәсіби әрі кәсіпкерлік құзыреттерін қалыптастыруға мүмкіндік береді.
Ынтымақтастық аясында бірлескен білім беру бағдарламаларын іске асыру, «Даму» қоры сарапшыларының қатысуымен оқыту семинарларын, тренингтер мен шеберлік сыныптарын өткізу, сондай-ақ білім алушылар мен түлектер үшін тағылымдамалар мен тәжірибелер ұйымдастыру және оларды жұмысқа орналастыруға жәрдемдесу жоспарлануда.
Меморандумға қол қою университеттің тұрақты дамуы, бәсекеге қабілеттілігін арттыру және өңірдің білім беру және ғылыми кеңістігіндегі позициясын нығайту үшін жаңа мүмкіндіктер ашады.
2026 жылғы 12 наурызда Қазтұтынуодағы Қарағанды университетінде «Заң және тәртіп» идеологиясын ілгерілетуге бағытталған іс-шара өтті.
Кездесуге құрметті қонақтар ретінде Қарағанды облысы прокуратурасының 6-басқармасының прокуроры К.С. Байдильдин, Қарағанды облысы мекемелерінде қылмыстық жазалардың орындалу заңдылығын қадағалау жөніндегі мамандандырылған прокуратураның прокуроры Я.А. Горохова, сондай-ақ Қарағанды облысы бойынша ҚАЖД-ның бас маманы Е.А. Бейсекеев қатысты.
Кіріспе сөзді университеттің комплаенс-қызметінің басшысы С.В. Федотов сөйлеп, кездесудің тақырыбын – «Әр адам өз таңдауын өзі жасайды» деп атап өтті. Ол өз сөзінде университеттегі сыбайлас жемқорлыққа қарсы қызметтің жұмысы туралы айтып, студенттерді заң талаптарын сақтауға және сыбайлас жемқорлыққа қарсы мәдениетті арттыруға шақырды.
Іс-шара барысында К.С. Байдильдин «Заң және тәртіп» идеологиясының құқықтық мәдениетті қалыптастыруға және жауапты азаматтық мінез-құлықты дамытуға бағытталған маңызды стратегиялық қағидат екенін атап өтті. Кездесу аясында Қарағанды облысының мекемелерінде жазасын өтеп жатқан сотталғандармен телемост форматы ұйымдастырылды.
Телемост барысында студенттер түрлі құқық бұзушылықтар, оның ішінде алаяқтық, дропперлік және есірткі заттарының заңсыз айналымына байланысты қылмыстар үшін жазасын өтеп жатқан сотталғандарға сұрақтар қою мүмкіндігіне ие болды. Қатысушылар өз өмірлік тәжірибелерімен бөлісіп, құқыққа қайшы әрекеттердің салдары туралы айтып, студенттерді заңды сақтауға және саналы өмірлік таңдау жасауға шақырды.
Қазтұтынуодағы Қарағанды университетінің «Маркетинг» білім беру бағдарламасының студенттері V Халықаралық «USkills-up Marketing Battle» маркетинг турнирінде III орын иеленді.
Турнирге түрлі жоғары оқу орындарының студенттік командалары қатысты. Байқау Қазақстан Маркетинг Ассоциациясы мен «Тұран» университетінің Маркетинг және логистика жоғары мектебінің бірлескен ұйымдастыруымен өтті.
Байқау кезеңдерінің қорытындысы бойынша МК-23-2 тобының 3-курс студенттері Ефимова Ксения мен Кожекпаева Калкажан финалға жолдама алды. Қорытынды «Stand Up Battle» кезеңінде команда өз жобасын сәтті қорғап, маркетинг саласындағы кәсіби дайындықтарының жоғары деңгейін, креативтілігі мен практикалық дағдыларын көрсетті.
Команданың ғылыми жетекшілері – экономика ғылымдарының докторы, профессор Накипова Г.Н. және экономика ғылымдарының магистрі Жапашов А.У.
Бұл жетістік Қазтұтынуодағы Қарағанды университетінің 60 жылдығына арналған іс-шаралар аясындағы маңызды нәтиже болып, университет студенттерінің жоғары деңгейдегі даярлығын тағы да дәлелдеді.
2026 жылғы 3 наурызда университетіміздің 60 жылдығына орай «Маркетинг трендтері 2026» тақырыбында қонақ дәрісі өтті. Дәрісті маркетингтік агенттік директоры Анна Митина жүргізді. Кездесу барысында заманауи digital-құралдар, жасанды интеллекттің маркетингке ықпалы және бизнес тарапынан қойылатын жаңа талаптар талқыланды.
Аталған іс-шараға «Маркетинг» және «Логистика» білім беру бағдарламаларының студенттері, оқытушылар және жас ғалымдар қатысты. Дәріс университеттің мерейтойлық іс-шаралары аясында ұйымдастырылып, теория мен тәжірибені ұштастыруға бағытталды. Спикер 2026 жылғы маркетинг саласындағы негізгі трендтерге тоқталып, цифрлық ортаның өзгеруі, маркетингтік процестердің автоматтандырылуы және брендтерді ілгерілетуде жасанды интеллектті қолдану мәселелерін жан-жақты қарастырды. Сонымен қатар тұтынушылар мінез-құлқының өзгеруі мен деректерді талдаудың маңыздылығы атап өтілді.
Талқылау барысында:
- жаңа digital-құралдар;
- маркетингтегі жасанды интеллекттің рөлі;
- тұтынушылар сұранысының трансформациясы;
- 2026 жылы жұмыс берушілер талап ететін құзыреттер қарастырылды.
Студенттер белсенді пікір алмасып, нақты кейстерді талдап, кәсіби дамуға қатысты практикалық ұсыныстар алды.
Мұндай іс-шаралар университеттің білім беру сапасын арттыруға және бәсекеге қабілетті мамандар даярлауға бағытталған стратегиялық қадамдардың бірі болып табылады.
Оқу орнының қабырғасында Қазтұтынуодағы Қарағанды университетінің 60 жылдығы аясында және Erasmus+ Jean Monnet №101127488 «Тұрақты дамудың заманауи экотехнологиялары: Еуропалық Одақ пен Қазақстан тәжірибесі» халықаралық жобасын іске асыру шеңберінде «Экотехнологиялық трансформация: ақылды қалалардан өнеркәсіптік декарбонизацияға дейін – ЕО мен ҚР тәжірибесі» тақырыбында дөңгелек үстел өтті.
Іс-шараның негізгі мақсаты – қалалық инфрақұрылым мен өнеркәсіптік жүйелерді трансформациялаудың инновациялық тәсілдерін талқылау, Еуропалық Одақ пен Қазақстанның үздік тәжірибелерін саралау, «ақылды» технологияларды енгізу арқылы өңір экономикасындағы көміртегі жүктемесін төмендету жолдарын айқындау болды.
Дөңгелек үстел барысында экотехнологиялық трансформация, Smart City (ақылды қала) тұжырымдамасы, энергоменеджмент, көміртекті реттеу, парниктік газдар шығарындыларын мониторингтеу, төмен көміртекті даму стратегиялары, сондай-ақ өнеркәсіп саласын декарбонизациялау тетіктері кеңінен талқыланды.
2026 жылғы 17 сәуірде Қазтұтынуодағы Қарағанды университетінде Қарағанды облысының Ішкі саясат басқармасының облыстық ақпараттық-түсіндіру тобының қатысуымен ақпараттық кездесу өтті.
