«MARKETING & LOGISTICS WEEK: идеядан нәтижеге дейін» декадасының қорытындылары
2026 жылғы 12–16 қазан аралығында Қазтұтынуодағы Қарағанды университетінде маркетинг және логистика кафедрасының «MARKETING & LOGISTICS WEEK: идеядан нәтижеге дейін» декадасы өтті.
Қаржы, логистика және цифрлық технологиялар факультетінің маркетинг және логистика кафедрасы ұйымдастырған іс-шара білім алушылардың кәсіби құзыреттерін дамытуға, университет пен бизнес-қоғамдастық арасындағы өзара іс-қимылды нығайтуға, «Маркетинг» және «Логистика» білім беру бағдарламаларын танытуға, сондай-ақ студенттерді ғылыми және практикаға бағдарланған қызметке тартуға бағытталды.
Декада бағдарламасы кәсіби экскурсияларды, зияткерлік және іскерлік ойындарды, командалық тренингті, ғылыми конференцияны және қорытынды марапаттау рәсімін қамтитын бес тақырыптық күннен тұрды.
12 қазан — START DAY: Танысу күні. «Мамандыққа ішкі көзқарас: нақты бизнестегі Marketing & Logistics» іс-шарасы аясында студенттер QazTehna зауыты мен «Saryarqa» телеарнасына барды. Экскурсиялар барысында білім алушылар өндірістік процестердің ұйымдастырылуымен, заманауи кәсіпорындардың жұмыс істеу ерекшеліктерімен және медиа саласының қызметімен танысты. Кәсіби ортамен тікелей танысу болашақ мамандықты тереңірек түсінуге ықпал етті.
«Saryarqa» телеарнасына жасалған экскурсия болашақ маркетологтарға медиа саласының кәсіби ортасына еніп, телевизиялық өндірістің ұйымдастырылуымен, ақпараттық контент жасаумен және заманауи бұқаралық ақпарат құралдарының жұмыс ерекшеліктерімен танысуға мүмкіндік берді.
13 қазан — DISCOVER DAY: Жаңалықтар ашу күні. Студенттер мен «№ 5 қосымша білім беру мектеп-орталығының» оқушыларын біріктірген «Университетті таны. Мамандықты таны» атты UniQuest зияткерлік ойыны өтті. Қатысушылар білімдарлығын, командада өзара әрекеттесу дағдыларын және тапсырмаларды орындаудағы шығармашылық тәсілдерін көрсетті. Іс-шара оқушыларды университетпен және сұранысқа ие даярлау бағыттарымен таныстыруға арналған кәсіптік бағдар беру жұмысының тиімді формасына айналды.
14 қазан — PRO DAY: Мамандықтар күні. «Логистика» және «Маркетинг» білім беру бағдарламаларының бірінші курс студенттері талдамалық ойлауды, шешім қабылдау және командада жұмыс істеу дағдыларын дамытуға бағытталған «Табысқа апарар бағыт» интерактивті іскерлік ойынына қатысты.
Сонымен қатар командалық рухты қалыптастыруға арналған психологиялық тренинг өтті. Күннің практикалық бөлігін «КСЕР» ЖШС (КСЭП) кәсіпорнына және қаланың теміржол вокзалына жасалған экскурсиялар толықтырды. Онда студенттер логистикалық процестердің ұйымдастырылуымен және көлік инфрақұрылымының жұмыс істеу ерекшеліктерімен танысты.
15 қазан — RESEARCH DAY: Ғылым және идеялар күні. Университетте «Жас зерттеушілер форумы» халықаралық конференциясы өтті. Конференция қатысушыларға ғылыми зерттеулерінің нәтижелерін ұсынуға, идеялармен алмасуға және ғылыми тұрғыдан дәйектеу дағдыларын көрсетуге мүмкіндік берді. Іс-шара зерттеу мәдениетін, сыни ойлауды және студенттердің ғылыми қызметке қызығушылығын дамытуға ықпал етті.
«MARKETING & LOGISTICS WEEK: идеядан нәтижеге дейін» декадасы білімді, ғылымды және кәсіби практиканы біріктіретін алаңға айналды. Іс-шараларға қатысу студенттерге кәсіби дүниетанымын кеңейтуге, коммуникативтік, талдамалық және зерттеу дағдыларын дамытуға, командалық құзыреттерін нығайтуға және қазіргі еңбек нарығының нақты талаптары туралы түсінік алуға мүмкіндік берді.
Осындай бастамаларды өткізу оқытудың практикаға бағдарланған тәсілін жүзеге асыруға, университеттің жұмыс берушілермен серіктестік байланыстарын нығайтуға және маркетинг пен логистика саласындағы болашақ мамандардың кәсіби әлеуетін қалыптастыруға ықпал етеді.
Маркетинг және логистика кафедрасы университет пен факультет басшылығына, серіктестерге, оқытушыларға, студенттерге және еріктілерге белсенді қатысқаны және декаданың табысты өтуіне қосқан үлесі үшін алғыс білдіреді.
